CILA ESHTE ENDERRA JONE?

Në takimet e mia nëpër Shqipëri me pastorë dhe drejtues kishash kam ngritur vazhdimisht një pyetje: Cili duhet të jetë Vizioni i VUSH? Besoj se përgjigjet e tyre janë përputhur me zemrën e Zotit. Zemra e Perëndisë sonë është tek të humburit. Kjo duket tek Porosia e Madhe: “Shkoni, pra, dhe bëni dishepuj nga të gjithë popujt…”. Duket kur Krishti u thotë dishepujve: “…dhe do të bëheni dëshmitarët e mi në Jeruzalem e në gjithë Judenë, në Samari e deri në skajet e dheut.”

Ai ka një strategji për t’ia çuar ungjillin popujve. Në këtë strategji kemi edhe unë e ti një rol. Ne kemi përgjegjësi ta përhapim ungjillin me fjalë e me jetën tonë. Gjithashtu Zoti ka dëshirë që ungjilli të përhapet edhe përmes një mënyre tjetër: “bota të shohë se ne jemi një në Të.”

Tek ungjilli i Gjonit kapitulli17, Jezui lutet tre herë që ne të jemi një dhe qëllimi i tij është shumë i qartë: “…që bota të besojë se ti më ke dërguar”. Të qënit një në Të është diçka që duhet të jetë e dukshme edhe për sytë e botës.

Pyetja që lind është sesi do të duket “të qënit një në Të”?

Do të duket nga dashuria për njëri-tjetrin. Takimet dhe konferencat e përbashkëta janë një mënyrë. Përveç këtyre një mënyrë shumë e dukshme, “e të qenit një” në sytë e komunitetit, është edhe përpjekja e përbashkët për ungjillin. Dua të përmend këtu disa shembuj të kësaj përpjekjeje të përbashkët: projekti AERO me filmin “Jezus”, bashkëpunimi i kishave të Lushnjes, Elbasanit, Peqinit, për shpërndarjen e pakove të projektit “Samaritan’s Purse”, takimet e përbashkëta ungjillizuese etj.

Një rast i veçantë ishte edhe bashkëpunimi i kishave të Tiranës për t’i dhënë çdo qytetari të Tiranës mundësi të shumta për të dëgjuar Ungjillin.

Cila, pra, është ëndërra jonë e përbashkët? Cili është vizioni i VUSH-it?

Unë do ta shpreh shumë thjeshtë: “Së bashku t’ia çojmë ungjillin çdo shqiptari e përtej.” Unë besoj se kjo shpreh dëshirën e Zotit për Kishën e Tij në Shqipëri, sepse përfshin:

“Së bashku”- zemra e Zotit që të jemi në unitet; “t’ia çojmë ungjillin”- detyra që iu besua kishës; “çdo shqiptari e përtej” - shpreh strategjinë e Zotit për të filluar nga Jeruzalemi, e për të vazhduar në Jude, Samari e deri në skajet e dheut.

Kjo ishte ëndrra e Rilindasve që themeluan Vëllazërinë Ungjillore. Kjo është edhe ëndrra jonë.

Kjo ëndërr s’mund të përmbushet pa ju. Ju dhe Kisha juaj jeni një gjymtyrë e rëndësishme për të cilën gjithë “trupi” ka shumë nevojë.

A do të bashkohesh me ne që ta shohim këtë ëndërr të realizuar? Eja dhe së bashku t’ia çojmë ugjillin çdo shqiptari e përtej!

Ilir Stavro

Sekretar i Përgjithshëm

Vëllazëria Ungjillore e Shqipërisë.